استرالي من أصل مصري بيحب إيران فى السعودية ؟؟؟؟؟

فوجئت بالثقافة الإيرانية لذلك الرجل الذي جاء مكتبي للتعاون الدخول فى مشاريع مشتركة وقد يكون وصوله إلى مكتبي يحمل صدفة فعلا ، لكن الغير مفهوم انه بأسئلة بسيطة للتعرف على الشخص وصلت للمطلوب ،
البداية كنت أحاول ومعي شريكي التوصل إلى شراكة مع احد الممولين لأحد المشروعات التي تزيد متطلباتها عن إمكانياتنا وعن طريق احد الذين طالبناهم بالمشاركة وهو يمنى يعمل بتجارة مواد البناء عرف شريكي على احد المصريين العائدين من استراليا وعامل استثمار فى السعودية ، وله تليفون فى سلطنة عمان ويسافر إلى بلاد كثيرة منها ألمانيا لم تأتى مناسبة لمعرفة إيه سبب تشعب سفرياته وحاصل على جنسية استرالية ( على فكرة كانت استراليا من أهم الدول المشاركة مع بريطانيا وأمريكا فى احتلال العراق ) والذي رجع للمنطقة حسب كلامه للمشاركة فى بناءها وتطويرها حتى يكون له دور فى الحياة بدل ما هو كمهندس معماري يقوم بتعمير بلد اسمها سيدنى فى استراليا
دخل على الرجل وهو يرتدى فانلة شبه داخلية بيضا على بنطلون جينز ولابس سويتر اسود و يربى فى وجهه سكسوكة ( ذقن صغيرة مقصوصة من كل ناحية حول الفم فقط زى سكسوكة خاتمي الرئيس الايرانى السابق) والسيد كان يعمل موظف فى جامعة هناك وابن عمه اللي كان يعمل فى أيام زمان فى سفارة بلجيكا هو اللي عرفه على احد الاستراليين الذين كان قنصل استراليا فى عام حاجة وسبعين فى المملكة العربية السعودية التى كان يعمل فيها فى الحكومة مهندس وقتها ، ووفى أثناء الحديث يقول انه كان يعيش فى استراليا فى منطقة داخل سيدنى اسم الشهرة لها فى استراليا (( تل أبيب )) ليه ، علشان ساكن فيها اليهود بس ، طيب يا عم يا مصري المكان ده كنت تشتكى من حاجه من وجودك فى وسط اليهود قال أبدا دا كان أحسن مكان وللعلم كان غالى جدا السكن هناك، طب يا عم يا مصري إيه اللي رجعك قال لى عايز أعيش هنا جنب جدي جدك مين يا عم قال لي النبي ( صلى الله عليه وسلم ) .......؟؟؟؟؟؟.
قال :أصل أنا أتشرف ،
قلت : مدعيا نوع من الغباء يعنى إيه
قال : يعنى أنا شريف
قلت : إيه اللي عرفك
قال :أبويا كان نقيب الأشراف فى مصر زمان وكان النقيب المالي لان كان فيه النقيب الادارى والنقيب الرسمي والنقيب المالي اللي هو أبوه ، وأنا عندي شهادة من نقابة الأشراف لانى عندما رجعت إلى مصر منذ سنتين ،سألت فين النقابة لان مكتب أبويا وكان محاسب كان فيه مكتبين بتوع النقابة قالوا لي انتقلت عند النقيب الجديد والآن هي فى الزمالك ، فأنا رحت هناك وقلت لهم عايز شهادة قالوا ادخل سلم على النقيب سلمت على النقيب الجديد وأخذت الكرت بتاعه وأعطانى الشهادة بعد ما ختمها لى بخاتم النقابة
بصراحة أنا استغربت على المواطن المصري اللي تحول لاسترالي واللي بيكره مصر كره العمى وحريص انه يبقى شريف ، فسألت الرجل هل تستطيع إثبات نسبك
قال : نعم أنا من طرف على زين العابدين بس أنا مش حافظ يعنى بالضبط فكملت سؤالي مين اللي يعرف ؟
قال : النقابة
فقلت له : الشهادة دى مضروبة وأنا ممكن ادفع للنقابة دى وأجيب واحدة زيها ، وعلى فكرة النقابة دى أعطت واحدة زيها لحسنى مبارك وبتقول انه من الأشراف وعلى فكرة اللي بيدفع فلوس بتدى له النقابة الشهادة دى .
قال لي : على فكرة اللي ماسك النقابة الآن لواء قلت كويس علشان النقابة متشتغلش تبع حد
قال :زى مين
قلت : إيران مثلا الإخوان أو أمريكا وعلى فكرة اللي يتبنى النقابة الآن وواقف معاها رتشارد دونى سفير أمريكا فى مصر السابق والأمريكان يدعموا النقابة
فالرجل من أول هنا والانفعال والارتباك ظهر على وجهه ، ومش عارف يعمل معايا ايه فقال كلمات بينه وبين نفسه وهو يهز رأسه لم استوعبها ، وتردد بشيء من الارتباك أن يكمل فى التفاصيل دى ، ولكنه يبدوا انه تراجع عن تردده وقال إيران مالها إيران ، فسألني سؤال ومتى إيران كانت عدو لنا قلت على طول إحنا كمصريين مالناش علاقة مع دولة إيران ولسه الإيرانيين عاملين فيلم يشتموا على السادات ، وبيننا وبينهم مصانع الحداد من ساعة ما ايات الله ما جاءوا،
قال لي : يعنى الشعب المصري عمري ما شفت حد من الشعب المصري ضد إيران
قلت: أنا تبع الشعب وأنا ضد إيران وعلى فكرة أنا صعيدي من أحشاء الصعيد وعمري ما حبيت إيران واللي اعرفه فى بلدنا أن محدش بيحب إيران ، إحنا مصريين وبنحب مصر وما ليش مصلحة أن أحب إيران وإيران أصلا محتلة العراق ، قالي لي إيران عمرها ما احتلت بلد دا الوهابيين اللي ينشروا ذلك هو آنت وهابي قلت له أنا مصري ، والشيخ يوسف القرضاوى فضح أفعال إيران ، وأنا مع الشيخ القرضاوى.
قال لي : حنرجع للمشايخ الوهابين تانى
قلت له : عايزنى ارجع لمشايخ إيران آيات الله العظمى والكبرى ، أنا بصراحة ما بحبهمش والشيخ القرضاوى مش وهابي على فكرة
قال لي : هو أنت مش عارف انك كنت أنت شيعي لمدة 300 سنة
قلت له : قصدك على الدولة الفاطمية
قال : ايوه
قلت : يا عم دا الحكومة أيامها اللي كانت شيعية والمصريين أصلا ما كانوش يعرفوا ، وهو الحكومة لو بقيت شيعية من غير ما يعرف حد من المصريين ذلك ، يبقى الشعب شيعي أنا لا اعتقد ذلك ، وهو يعنى كده أقول الآن إن الشعب المصري يهودي الآن علشان الحكومة مع اليهود يبقى أنت الآن يهودي لا اعتقد انك تقبل ذلك .
قال لي : ليه دا أميركا قامت بمساعدة الشاه ضد ثورة مصدق هو يعنى الشاه كان حلوا
قلت له : الله أعلم ممكن يكون حلو كان بيساعد السادات فى حرب أكتوبر .
قال : على فكرة كان الشاه متزوج من أخت الملك فاروق
قلت له : هو الملك فاروق ولا عائلته كان يعنى مصري أصلا ،المهم الشاه مكنش عدو لينا كمصريين ولم يكن يحاول أن ينشر الفكر الشيعي فى مصر
قال لي : سيبنا من الملك، لكن أنت ما تعرفش مصر كويس ، لازم تقرأ عن مصر ، وفيه كتاب كتبه واحد هنا فى المكتبة اسمه اسمه ........ حمدان اقرأه وحتعرف انتم ين.
قلت : جمال حمدان ، قصدك كتبا شخصية مصر
قال ايوه
قلت له : عندي وقرأته ، المهم أنا مصري وأكره إيران وموافق على اللي قاله جمال حمدان عن مصر ، وعلى فكرة كل الذين احتلوا مصر سواء الفرنسيين أو الانجليز او الشيعة طردوهم المصريين وبقوا زى ما هما وده اللي بيقوله جمال حمدان، وأنا دخلت الجيش المصري وكنت وما زلت مستعد أن أضحى بحياتي ضد اى حد بيفكر يضر مصر.
قا لى : أنت منين
قلت له : انا قلت لك من شوي انا من المنيا ومن أحشاء المنيا من قريه تبع مركز فى المنيا اسمها اسطال وعلى فكرة دى بلد المشير عبد الحكيم عامر .
المهم تحولت فى هذا الحوار إلى عدو للرجل اللي بيشوفنى لأول مرة علشان أنا ضد آيات الله بتوع إيران .
الغريب الراجل مش باين عليه التدين قوى بس وأنا لا ادعى انى افهم فى الأنساب ,والاشكال حتى أفسر لون الرجل ونوع شعره وشكل عينيه تقول انه ، والمفروض الإقامة فى بلد زى استراليا يخليه متقبل للرأي الآخر ، والمفروض عيشته فى وسط اليهود ( اللي أصلا لا يعيش وسطهم غير يهودي ) وهو مصري بيقول انه مسلم وبالمناسبة سألته هو أنت شيعي قال لى لا سنى ، فقلت له هل لك مذهب معين قال لي لا طيب أبوك كان شيخ ازهرى قال لي لا هو خريج تجارة ( بالنسبة لجيل والده كانت التجارة الله اعلم كان لها كلية أم لا )
واللي استغربت له طيب بتكره مصر والسعودية وتحب إيران وعارف عنها اكتر من مصر ليه ؟
وما زال السؤال يحيرني حتى الآن .